بیلگی لر

عبدالصمد ملکی
سودا اوزن ماشین
ژاپن شرکتی سودا اوزه بیلن یونگول برقی ماشین دوزلدیب.
سئل، طوفان، سونامی کیمی طبیعی بلالار زمانی معمولی ماشینلار ایشدن دوشور و انسانلارین جانین قورتارماغا فقط هلکوپتر و کیچیک قاییقدن استفاده ائله‌مک ممکن اولور.
ژاپنلی‌لار بو موقعیّتلرده استفاده اولونا بیلن ۴۶۰ کیلو گرم آغیرلیغیندا ماشین دوزلدیبلر. اونلار بو محصولو بازارا وئرمک نیّتینده‌دیلر.
بین المللی گزارشلره گؤره دنیانین باشا باشیندا چوخ یئرلر یاغینتیلارین چوخالماسی ایله اوز- اوزه قالاجاقلار. ConceptOne One آدلانان بو ماشینین بؤیوک مقیاسدا بلالاردا نئجه ایشله‌مه‌سی هله بللی دئییل.
بو ماشینین دوزلتمه ایده‌سی ژاپندا باش وئرمیش ۲۰۱۱-جی ایلی‌نین سونامیسیندن سونرا Fomm شرکتین مدیری »هیدو تسوروماکی«نین ذهنینه گلدی.
Concept One ConceptOneماشینی آیری برقی ماشینلار کیمی، باطریسی‌نین دولدورماسی اوچون شارژ مرکزلرینه احتیاجی وار و اضطراری وقتلرده ده بئله یئرلرین خدمت وئرمه‌سی امکانسیز اولار.
شرکت، بو ماشینین شارژدان سونرا نه قدر سویون اوزونده قالما گوجونون اولماسینی هله دئمه‌ییب.
گؤز لنزی ایله قانین قندینی اؤلچمک اولار
گوگل شرکتی‌نین وئردیگی خبره گؤره بو شرکت قانداکی گلوکوزون اندازه‌سینی بیلمک اوچون گؤز یاشیندان استفاده ائله‌مگه آنالیزلر آپاریر. دوزلمه‌سی نظرده توتولان لنز، سیمسیز بیر چیپ و لنزین ایکی لایه‌سی آراسیندا یئرلشن مینیاتوری گلوکوز سنسوروندان تشکیل تاپاجاق.
بین المللی دیابت فدارسیونون اعلامینا گؤره، ۲۰۳۵-جی ایلینه قدر هر اون مین نفردن بیر نفرین دیابتی اولاجاق.
دیابتلی انسانلار قانلارینداکی گلوکوزو تئز-تئز اؤلچمه‌لیدیلر. چونکی گلوکوزون بیردن بیره آزالیب و یا چوخالماسی‌نین قورخولو عاقبتی اولار. ایندیلیکده قانین نئچه قطره‌سی ایله گلوکوزون اندازه‌سینی تعیین ائدن دستگاهلار وار.گوگل شرکتی‌نین دئدیگینه گؤره، بو شرکت بو لنزین بیرینجی نمونه‌لرینی آزمایش ائلیر. بو لنز هر ثانیه‌ده بیر دفعه قانداکی گلوکوزون مقدارینی اؤلچور.
بو شرکت بو محصولو بازارا وئرمک اوچون آمریکانین داوا و غذایا نظارت ائدن سازمانی ایله مذاکره‌یه باشلاییب. هابئله شرکت بو محصولو تکمیل‌لتمکدن اؤترو اؤزونه شریک آختاریر.
نروژ شهری‌نین یوز ایللیک گونشسیزلیگی باشا چاتدی
نروژده اوچ مین بئش یوز نفر ساکنی اولان »ریوکان« شهری، یوز ایل بویونجا گون ایشیغیندان محروم ایدی و ایندی انسان تکنولوژیسی سایه‌سینده گون ایشغیندا بوغولاجاق.
ریوکان شهری، داغلارین آراسیندا قالیب سپتامبر و مارس آیلاری آراسیندا گون ایشیغیندان محروم اولوردو. بو شهرین بناسی، یوز ایل بوندان اوّل »سام اید« آدلی بیر شخصی واسطه‌سی ایله طبیعی کود تولیدینده بو منطقه‌ده یئرلشن آبشارین طبیعی گوجوندن استفاده ائتمک اوچون، قویولوب و بو شرکتین ایشله‌ینلر اوردا قالیرلار.
شهر ساکنلری همان زماندان بو شهرده گون ایشیغیندان فایدالانماق اوچون چاره آختاریردیلار و اونون جبرانی اوچون داغ باشینا، گونشین ایشق سالدیغی یئره قدر، شهردن بیر تله‌کابین چکمیشدیلر.
آما شهرین بناسیندان یوز ایل سونرا ایندی داغ باشینا اوچ بؤیوک ۱۷ متر مربعلیک آینا یئرلشدیریلیب کی کامپیوتر برنامه‌سی ایله گونه باخان کیمی گونشی ایله فیرلاناجاقلار و گونون ایشغینی شهرین مرکزینه انعکاس وئره‌جکلر. بو آینالار ۷۱۰ مین یورویا باشا گلیب.
عالیملرین تازالیقدا بیلدیگینه گؤره، انسان آغزینداکی باکتری‌لر هر کسین اؤزونه مخصوصدور و کیملیگی معیّنلشدیرمک اوچون بارماق اثری کیمی اوندان استفاده ائتمک اولار.
تحقیقاتین گؤستردیگینه گؤره، بو باکتری‌لرین فقط یوزده ۲-سی بوتون انسانلاردا مشترکدی کی اونلارین‌دا غلظتلری هانسی ملّته عاید اولدوغونا اساساً فرقلی اولور. باکتریلرین یوزده سککیزی‌ده آنالیز اولانلارین یوزده دوخسانیندا واریدی. اوهایو دانشگاهی‌نین پریودنتولوژی اوستادی، “پورنیما کاپور” بو باره‌ده دئییر: بو، بیرینجی دفعه‌دیر کی آغیز ترکیباتی‌نین ملیّت تشخیصینده ال وئریشلی اولدوغو گؤستریلیر.
او آرتیردی: بو زمینه‌ده هئچ کس آیریسینا تای دئییل. عیناً بارماق ایزینده اولدوغو کیمی.
DNA طریقی ایله ملیّتلرین معیّنلشمه‌سی فقط یوزده ۶۲ دوز چیخیر آما بو مئتوددان استفاده ائدنده یوزده یوز، دوز تشخیص وئرمک اولور.
کومار و همکارلاری بو آزمایشده آغیز سویو دیشلرین سطحی و دیش اتی آلتینداکی باکتری‌لردن استفاده ائدیبلر.
دونیانین اَن سوادلی اؤلکه‌لری هانسی‌لاردی؟
توسعه و همکارلیق سازمانی‌نین (OECD ) وئردیگی سیاهی‌یا گؤره روسیه توسعه تاپمیش اؤلکه‌لرین ایچینده اَن سوادلی جمعیّته مالکدیر. ۲۰۱۱-جی ایله قدر روسلارین ۵۳٫۵ درصدی‌نین کالج مدرکی وار. بو سازمانین سیاهی‌سینا گؤره دنیانین اَن سوادلی اون اؤلکه‌سی بونلاردیر: روسیه: ۲۰۱۱-جی ایلینده ۶۴-۲۵ یاش آراسی جمعیتین یاریسیندان چوخو کالج سطحینده و یوزده ۹۵ –ی متوسطه مدرکلری واریدی.
کانادا: ۲۰۱۱-جی ایلینده هر دؤرد کانادالیدان بیری فنی حرفه مهارتی دؤره‌سی گؤرموشدو.
ژاپن: ژاپنلی‌لارین یوزده ۴۶٫۴-ی‌نین کالج تحصیلاتی وار. و یوزده ۲۳-و عالی تحصیلات آلیبلار.
آمریکا: بو اؤلکه‌‌ جمعیتی‌نین یوزده ۴۲٫۵-ی‌نین کالج تحصیلاتی وار.
جنوبی کره: کره‌لی‌لر درسی قورتاراداندان سونرا آیری اؤلکه‌لره نسبت داها راحت ایش تاپا بیلیرلر. بو اؤلکه‌ده لیسانس آلانلارین فقط ۲٫۶ درصدی ایشسیز قالیبلار. بو اؤلکه‌ جماعتی‌نین یوزده ۴۰٫۴-‌نین کالج تحصیلاتلاری وار. بریتانیا: بو اؤلکه‌ جماعتی‌نین یوزده ۳۹٫۴-نون کالج حدّینده تحصیلاتلاری وار.
نیوزلند: نیوزلندلی‌لرین چوخو متوسطه دؤره‌سیندن سونرا تکنیکی و فنّی مهارتلری کسب ائلیرلر. بو اؤلکه جماعتی‌نین یوزده ۳۹٫۳-نون بئله تحصیلاتی وار. نیوزلند بودجه‌سی‌نین یوزده ۲۱٫۲سی تحصیلاتا صرف اولور.
فنلاند: بو اؤلکه جماعتی‌نین یوزده ۳۹٫۳-نون کالج حدّینده تحصیلاتی وار.
استرالیا: بو اؤلکه جماعتی‌نین یوزده ۳۸٫۳-نون کالج حدّینده تحصیلاتلاری وار.