بو گون کی دونیامیز

بو گون کی دونیامیز

حاضیرلایان:اکبرسعادت
آنادیلیمیز:بوگون دوغروسی گوزه ل بیر گوندور , دنیا ملتلرینین اوجالیق گونودور , بوگون هامیدان آرتیق مظلوم و اسیر اولان ملتلر اوچون قیمتلی و بویوک بیر گوندور , بوگونلر , حریت و قورتولوش سئون ملت , قارانج آپارا بیلمسه و کوکون ظلم باتلاغیندان چیخارا بیلمسه داها گناه و تقصیر بیر کیمسه نین بوینونا دئییل , داها حقی یوخدر کی کیمسه نی اوزونه ظالم و دشمن بیلسین چونکی هیچ بیر کیمسه آند ایچمه یبدر کی اوزون بوراخیب اوزگه سینه جان یاندیرسین (سوریه و داعش)
بوگون دنیانین هر بیر قیراق بوجاغیندا , اویان ها اویان , و آییلها آییلدیر , و بو اویانماقلاردا هر کیمدن اول , هر ملتین اوزی اوز ایچیندن اویانمادا و حرکت ائتمکده در , چونکی بو اوزوندن اویانماق و حرکت ائتمک کاملا طبیعی و اولدوقجا آنا بیر دوغوجودر .بو آنا دوغو و طیبعی گوورمک هر زمان باش آلتیندا و ال اونونده دئییل بلکه اوزونون اولچولموش و تعیین اولموش بیر فصلی واردر کی ایگیت و یورولماز اولان بیر اکینچی اونی اوز وقتینده گرک اکسین , گرک گوورتسین و سونرا حاصل گوتورسون , یوخسا وقتینده اکیب و بیچمییه ن , جانین ایشه سالمییان بیر کیمسه قحطه و بهالیغا دوشرو بئله لیکله قورتولوش و حریت نعمتلرینه حسرت قالار .
بوگون ایگیرمی بیرینجی یوز ایلین اوجسوز بوجاقسیز هواسیندان , باشیمیز اوسته بوللی بوللی نور یایان قورتولوش گونشیندن اولدوقجا استفاده ائتمه لی و قازانج آپاریلماسا , بو گونش باتیپ بیرده چیخینجا قوری شاختالار , قارا گونلر بیزیم وارلیق میزی و قورتولوش اکینیمیزی بوگونکی کیمی یئنه ده یانماغا و یوخلوغا سورر.
بونون اوچون بوگون حله گئج اولمایب و حله فرصت الدن گئتمه یب , یوبانمادان و ال ساخلامادان بو قورتولوش گونشیندن اولدوقجا و باشاردیغجا قازانجلار آلمالییق .
بونلاردان باشقا بونی گرک بیلمک کی ظلم قویوسونا دوشموش بیر ملتین(سوریه) هر کیمدن اول گرک اوزونون سسی گلسین , اوزی اوزون بیلدیرسین سونرا یان اوره ده اولان قارداشلاریندان و دوستلاریندان یاردیم و کمک گوزله سین , یوخسا ظلم قویوسوندا سسیز یاتان و دنیانی آتان بیر ملتین وارلیغین کیم بیله جک , نه اوچون بیلسینلر ؟
بوگون دنیا بیر مرحله ده درکه گئچمیش زمانلار ایله هیچده توتشدور مالی و قیاس ائتمه لی دئییل , بوگون دوغروسی گوز بره لدن و هوش اویدوران بیر گوندور , چونکی علم و صنعت طب , ارتباط وسائلی , هوا قوه لری , اکین ترقیسی شهرلر و کندلر آبادلیغی هابئله اوست اوسته حقوق و تساوی , حقوق عصیانلاری , گئچمیش ایله هیچده برابر اولا بیلمز , بونون اوچون بوگونکی دنیادا , اتم دنیاسیندا ترقی و ایره لیلیک سئون و قوروتولوش دیله ین هر بیر ملت اوچون هر بیر شئی آسان و هر بیر شئی آز بیر چالیشماق ایله اله گلر .
بوگونکی وسائل , و تکنولوژی دنیاسینین نه حالدا اولدوغون بیلمک اوچون و ایندی ایله گئچمیش دنیاسین آیدین تانیماق اوچون باخالیم کی گئچمیش نه ایدی و ایندی نه در ؟
گل و گئت و یوک وسیله لری , گئچمیش زمانلاردا گل و گئت و یوک آپارماق وسیله لری آت , قاطر , ده وه , اوکوز ایدی , بونلاردان چوخ اوزون اولان بیر زمانلاردان سونرا , ایره لی و ترقیلی اولان , گل – گئت مینیکلری , داشیرقالار ( داشقالار ) و اوتاقلی اولان آرابالار ایدی کی او زمان اوچون لاپ یئنی و اونملی بیر وسیله لر ساییلاردیلار .
او زمانلار بو شهردن اوشهره گئتمک , هابئله بواولکه دن او اولکه یه گئتمک اوچون هردن بئش و آلتی آی چکردی و چوخ وقتلر یول آراسی انسانلار ناخوش اولوب آرا – بیر آرا بیر و یا بیرلیکده اولردیلر و یا سویوغا و ایستیه دوشوب آرادان گئدردیلر .
چاپار ائولری و یا پست خانه لر , یوللارین لاپ پیس و قورخولی اولدوغو شهرلرین بیر بیریله آراسین قیراردی , بئلئیکی بو شهردن او شهره مکتوب آپارماق اوچون یوزلرجه چاپار , و چاپار ائولری , چاپار آتلاری گئجه – گوندوز چاپاردیلار آنجاق بونلار ایله بئله حله بعضی وقتلر نه چاپار و نه ده مکتوب گئدیب چاتاردی , بونون اوچون او زمانین چاپاری و یا پستی اولدوقجا چتین و دئدیکجه مشکل ایدی , فقط تورک امپراطورلاری بو چتین ایشلری او زمانین حالینا گوره آسان ائله میشدیلر کی مثلا تهراندان – تبریزه بیر نئچه چاپار آپاران مکتوب گئدیب چاتاردی .
معارف و علم :کتابلار ال یازیسی ایدی , هر یئرده و هر کیمده اولمازدی مینده , یوزده بیر کیمسه ده سواد اولاردی , یاخیندا اولمویونجا بیر کیمسه بیر کیمسه نین اورک سوزون و ایسته دیگین و مرامین دوشونمزدی , و کتاب اوقدر دئییل ایدی کی بیر نفرین فکرین مینلرجه کیمسه یه یئتیرسین , رادیو و تلویزیون و یا تلفون و باشقا شئی لر مطلقا یوخ ایدی .
طب و توختاق ایشلری:طب و معالجه اوچون چوللرین اوتلاریندان , بعضی خرافی فکرلردن استفاده اولوناردی , یوزده و مینده بیر آدام بو ایشلردن باش چیخارداردی , حله هر دوا و درمان آغرینی و سانجینی توختاتمازدی بلکه برکیدردیده , کور و چولاق ائدردی و حتی دیریلتمک یئرینه ئولدورردی .
هر کوچه نین بوروغوندا و هر جاده نین دونومونده , اوفاجیق بیر توکاندا عطارلار و یا اوت علف ساتانلار وار ایدیلر کی او زمانلارین معالجلری و دکترلری ساییلاردیلار , و هردن آدام اولدوردوکلری اوچون کیمسه اونلارا بیر سوز دییه بیلمزدی چونکی اولوم قسمت اولان بیر یازی کیمی الله طرفیندن گوندریلمیش ساییلاردی
تعلیم و تربیت :تعلیم و تریبت هر شئیدن اول مذهب , دین و ایده اولچوسونده و میزانیندا ایدی هابئله وارلی – وارسیز , آداب و روسوم قاعده لرینه اویغون ایدی , بئلئیکی مذهب قوللوقچولاری , دینچی کیمسه لر , بو ایشلرده وار گوجلری ایله مذهب اولچوسونده و دین باخیمیندا چالیشماقدا ایدی لر , اوشاقلیغدان بویوک یانیندا دانیشماماق , دیل اوزون اولماماق , و بویوک و قوجالارین احترامین ساخلاماق و سوزونه باخماق , آتا – آنانین اوزونه قابارماماق و عبادت ائتمک , او زمانین یاخشی – یامان تعلیم و تربیت درسلری ایدی .
بونلاردان باشقا هر کیمین الله طرفیندن آنل یازیسینا دینمز سویلمز اطاعتی هر نه قسمت اولدی اونا شکر ائدیب دوزمگی او زمانین اخلاقیات و تعلیم و تربیتین تعین ائدردی .بورادا مذهب و دین اولچوسونده اولان تعلیم و تربیت ایله ایشیمیز و سوزوموز یوخ , آنجاق بو تعلیم و تربیت و اخلاق , گوده و قیسسا و اورتالانمیش اولدوغو اوچون هر بیر حساس و روحی موضوعلارا یئتیشه بیلمه دیگی آیدیندر .
حله بو , او زمانلاردر کی انسانلار یرتیجی حالدان بیر آز چیخاراق ئوزلری اوچون قانون لار یازیب و یا بویوک تانری طرفیندن اونلارا قران , انجیل , تورات , و باشقا قانون لار گوندریلیبدر , و حله بو دین قانونلارینین هردن بیری , بوتون دنیا ایره لیلیگی و ترقیسی اوزرینه دایاناراق اوزون ابدی و اولمز بیر قانون بیلر و بوتون هامیدان ایستر کی اونا تابع اولاراق بوتون دنیانی پوزوپ اونون نظری ایله یاپسینلا.
جامعه و خلقین بیر بیری ایله رابطه سی :خلقین بیر بیری ایله رابطه لری تک تک و فردی دئییل ایدی , بلکه بو رابطه لر اشاغی – یوخاری قات , هابئله ائل و ائولیک ایدی کی مذهب اوندا بیر نوع حاکم ایدی .
بوگون , بونون گئچمیشین ترسینه اولاراق , هر شئی و جامعه و علم اوستون بیر حالدا درلار , بیر یازی کتابدان , میلیونلارجا کتاب چاپ اولوپ یوزلرجه کندلره , اونلارجا شهرلره یایماق آساندر و گل – گئت وسیله لری , ارتباط و گوروش , خبر و تبادل افکار وسیله لری اولدوقجا یئین و سریع و آساندر , یئنه ده یوزلر و مینلرجه کتاب لاردا دنیا حرکتلری , جامعه , عقیده , مرام , دین ناسیونالیسم و جوربه جور سلیقه ایده ایدولوژی تاکتیک عملرینه ال تاپماق , اوخوماق , اوگرنمک الهام آلماق , تجربه ائتمک ,و اوز موقعیتینه گوره اونلاردان لازم اولانین سئچمک و ایشلتمک آسان آسان اللرده درلر .

نوشته شده توسط admin در چهارشنبه, ۰۲ دی ۱۳۹۴ ساعت ۷:۳۶ ق.ظ

دیدگاه


6 − شش =