بوردان بیر جیران گئچر

بوردان بیر جیران گئچر

سون بولوم
شهریار گلوانی
آنادیلیمیز:باخ» آغا دئدی « بو ایش کندیمیز و بوتون یئرلریمیزین خاریجینده باش وئرمه¬لیدیر. صاباح قوهوم قارداش، کندلی¬لر و اونون دوستلاری دالیمیزدا سؤز چیخارماسینلار. قوناق اؤلدورن آدی اوستوموزده اولماسین. مرزین یاخینلیغیندا ووراندان سؤنرا باشینی پاسگاها آپاریب اولانلاری آنلات.
دِکی حکومتین تهلوکه¬لی دوشمانین اؤلدورموسن. منیم عوضیم دن اونلارا دِکی سؤز اؤز آرامیزدا قالسین. بویاندادا دییریک کی تورک عسگرلری ووروبلار اونی. آنلادین آغالیغین یولونو اوغول؟گؤزلرینی آچدی. ایستی و یوموشاق یورقانین آلتیندا یورقونلوغو آزالمیش ضعیف بدنینی قیوریمسادی. یاواش یاواش هوشو باشینا گلدی. بو یئره نئجه گلیب چاتماسینی دوشوندی. نئچه ایللر بوندان قاباق آنا¬سیله کؤچموشدولر بو کنددن بلکه شهرده بیر تیکه چؤرک تاپا بیلسینلر. کندده کئچینمه لری یامان پیس اولموشدی. ایندی ایللر سونرا اعدام حؤکمی آلتیندا زینداندان قاچاراق یئنه¬ده دؤغما کندینه گلمیشدی. وطندن باشقا سیغینماغا هارا اولابیلیر؟
***
قاپی تیققیلدادی. تئز گؤزلرینی آچدی. آتا گؤزویله باخان آغا و سوت قارداشینین ائوینده اولماغا باخمایاراق همیشه بیر گیزلی نگرانچیلیق جانیندا یووا سالمیشدی. اؤزونو ییغیشدیردی.
– کیمدیر؟
« منم » دئدی آغانین اؤغلو.
» گلدیم«دئدی و قاپیا ساری گئدیب سورگویو دالییا چکدی.
آغانین اؤغلو اتاغا گیردی و قاپینی اؤرتدی.
» آتامدان بیر شیء ایسته¬میش¬سن قارداشیم« مهربانجا دئدی و آرتیردی» هاوا ایشیقلانمادان یؤلا دوشک دئییرم. سنی سینیردان کئچیرمک بوینومدا اولان وظیفه¬دیر. آخی سنه جان بورجلویام قارداش«
» ساغ اول قارداشیم« – دئدی: » ایندی گئیینه¬ریم«
آغانین اوغلو اوتاقدان خارج اؤلدی.
اتاقین خیردا پنجره¬سیندن ائشییه باخدی. هاوا ایشیقلانماقدایدی. ائولر قارانلیقین قوینوندا یوخلامیشدیلار. ایشیق ایسه یئر اوزونو دولدورمایا چالیشیردی یاواش یاواش. گئجه گؤره بیلمدیگی حیطین فضاسی ایندی گؤرونوردی. داملار تزه¬دن تیکیلمیشدی. شهر ائولریندن داها بزکلییدی آغانین ائوی. آغانین حیطینده سوت قارداشیله اوینامالاری و اویان بویانا قاچمالاری یادینا دوشدی. همن قارداش کی بیرآزدان سؤنرا اونو سینیرین اؤ تایینا کئچره¬جک.
قارداشیم قاچما بویله. گل منه ساری گل.. قؤی الیندن توتوم… دایان منه… آغانین اؤغلویلا ال اله قاچاردیلار اویان بویانا … هردن آغانین اؤغلونو باغرینا باسیب جانیم منیم.. قارداشیم منیم دییردی اوره ک دن. آغانین اوغلو اوزون اوزون اونا باخاردی » بیز نئجه قارداشیق؟« دئییب سوروشاردی. سیزین ائویز بؤیله کیچیک ، بیزیم کی ایسه بؤیله بؤیوک. سیزین ائوده هئچ نه یؤخ بیزیمکینده هر شئی وار. »آنام دئییر سوتومو اممیسن سن. اونا گؤره بال کیمی حلال قارداشیق بیز«
قاپی یئنیدن چالیندی.
»حاضیرام« – دئدی.
– ائله¬ده کیمسه¬نی اویاندیرمادان چیخاق ائودن.
ائشییه چیخدی. دوره¬سینه باخدی. ایندی حَیَطی داها یاخشی گؤره بیلدی.
»آغانین اللریندن اؤپمک ایسترم« ماوی گؤزلو قوناق دئدی» بلکه بو یئرلره بیرده دونمه¬دیم«
آغانین اؤغلونون جانیندان بیر سویوق کئچدی. بیر ایکی آددیم آغانین اتاغینا ساری یئریدی. سؤنرا نه¬یی دوشونوب دورومساندی آیاق ساخلادی و « یاتیبدی. گل اونی اویاتمیاق. دؤندویومده حلاللیق ایستدیینی اؤنا سؤیله¬رم» دئدی.
طوله¬یه¬گیردیلر. آغانین اؤغلو ایکی ات یهرلدی. آتلارین بیرنین جیلووونی سوت قارداشینا وئردی او بیریسینده اؤزی طوله¬دن ائشیگه چیخاردی. حیطدن چیخیب آتلاری میندیلر. کنددن سینیرا ساری گئتمه¬یه باشلادیلار. سحر یئلی یوموشاقجا آت بدنینده¬کیلرین اوزونه ووروردی. اکینلرین قوخوسی آلدیقلاری نفسلرله جانلارین تزه¬لندیریردی. آغانین اؤغلو آت بئلینده قیوراق اوتورموشدی. بدنی آتین حرکتلری¬له اویغون¬ا¬یدی. سوت قارداشی آما چتینلیک چکیردی آتین بئلینده.
یان یانا اولدولار. دؤنوب باخدیلار بیربیرلرینه. بیر آیدا ، حتتا بیر نئچه گون فاصله¬یله دوغموش اؤلمالارینا رغمن آغانین اؤغلو سوت قارداشیندان ایری¬ایدی. بیرآز گئدن¬دن سؤنرا آغانین اؤغلو قاباقا دوشدو.
دالیجا سوت قارداشی آت سوروردی. اوموت دؤلو گؤزلریله آغانین اوغلونا باخیردی. ایندی اؤزونون نه قدر جیلیز آریق قالماسینی داها یاخشی گؤروردی. گون نه قدر آشاغیلاردا اولسادا، نه قدر درینلرده اولسادا دوغونون گؤیونو شافاقلاندیرمیشدی. ایشیق سیچرامایا باشلامیشدی. سوت قارداشی آیاقلارینی اوزنگیه باسیب سو کیمی قاباقیندا آخیردی. بیرآز یهردن قووزانیب یئل کیمی یول کسیردی.
بیر تپه¬باشینا یئتیشنده آتینی ساخلادی آغانین اؤغلی.
»دیققتله گئتمه¬میز گرک. سینیرا آز قالدیق«داها دؤغروسو ذهنینده کی باشقا بیر شئی ایدی. آغانین سؤزلرینی بیربیر آغلیندان کئچیردی. ایستیردی اؤز تؤپراقلاریندان چیخماغا مطمئن اؤلسون. بیرآزدا آت سورمک ایسته دی کی سؤز یئری قالماسین.
گولومسه¬نه¬رک «آز قالمیشیق قارداشیم» – دئدی.
» سن منیم سوتومو آنامین دؤشوندن امیب قارداش اؤلموشوق« دئدی ماوی گؤزلو و آرتیردی» سوت حاققی ساده¬جه باغیشلانماز آما منده سیزین سویوزدان ایچیب سیزین بو یاخشیلیغیزا گؤره سوت حاققیمی حلال ائتدیم سنه. گل حلاللاشاق جانیم قارداشیم«.
آتلارین بئلینده قؤل آتیب بیربیرلرینی قوجاقلادیلار.
ایکیسینی¬ده دؤشلرینده اَمیشدیرن آنا اگر ساغ اؤلسایدی، ایندی آتلارین آراسینا کئچیب » آی اوغوللاریم« دئیردی. گلدیم ای منیم ماوی گؤزلی اوغلوم ، ای منیم آغامین تکجه بیر اوغلی. تؤپراغام من! سویام من!
چیچکلنیب بار وئرن آغاجام من! بئله اؤلماسایدیم ایکینیزی¬ده قوللاریم اوسته توتوب سوتلو ممه¬لریمی قوش آغیزلارینیزا سالا بیلیردیم؟ نه تئز یاددان چیخاردیز او گوزل گونلریمیزی؟
یئنه آتلاری سوردولر. آغانین اوغلی الین خورجونوندا اؤلان دوربونلی تفنگه چکدی. بیرآزدان دره یه یئنندن سونرا ماوی گؤزلی قارداشی یوققوشا قالخارکن قاباغا سالیب ایشینی بیتیرمه¬یه باشلایاجاغینی دوشوندی.
توفنگی خورجوندان چیخارماق ایسته¬دی.
یئنه ده آنا آرالارینا گیرمک ایسته¬دی. سانکی بیر آیاغی قاباخداکی اوغلونا، اؤبیر آیاغی دالداکی الی توفنگه گئدن ایللر بؤیو سوتویله بسله¬ین اوشاغینا قاچیردی.
یؤخسا اوتانماز الینله توفنگی چکیب قارداشینی وورماق ایستیرسن آغانین اؤغلی؟ اتلریم چورویوب اؤتا قوردا یِم اؤلماسایدی ایندی آچیب امیشدیردیگیم ممه¬لریمی گؤستریب اؤتانماز گؤزلرینه توپورردیم آغانین اؤغلی. امدیگین سوتلری نه تئز اونوتدون؟
دؤغما اؤغلومون سوت حاققی نیسنله بولوشوب جانیمین شیره¬سین سنه ایچدیردیم ایندی اؤغلومو ناحاق یئره دالدان ووراسان؟ آخی سنین آنانام من. مگر یاشادیغین تؤپراغا آنا وطن دئمیرسن؟ مگر وطنی منه بنزرتمیسن؟ اونوندا حاققینی بئله اؤدویه¬جکسن؟ ندن بئله آو کیمی قاباقان قاتمیسان اؤغلومی؟
توفنگی خورجوندان چیخاخاراندا، ماوی گؤزلی دؤنوب دالیسینا باخدی.
» یاخینلاشیریق هایلا دَییل؟«
توفنگی بوراخیب الیله آیاغینی قاشیماغا باشلادی آغانین اؤغلی.» هه یئتیشریک. آتین اوزونو اؤیانا چئویر«.آتلارین اؤزنو باتی یا چئویردیلر.
وورماغا اویغون یئر آختاریرسان یؤخسا؟ ووراجاقسان اگر هئچ اولماسا گؤزونه باخ. ایکینیزی بیر بدندن بسله¬ر¬کن گؤزومون بیریله سنه بیریله ماوی¬مه باخمادیم مگر؟ پیشمیشیم شؤر، شیرین، آجی، زهرله¬مه¬سین سنی دئییب ایلک قاشیقی اؤز اوغلوما یئدیتمدیم می عزیزیم؟ امانته خیانت ائدیلیرمی؟ سنی منه تاپشیراندا اؤوجوم قدریدین، قؤچلار کیمی ائدیب وئرمه¬دیم می سوتو قاچمیش آنانا؟ اؤغلومدا قاپیزا پناه گتیریب جانینی سیزه امانت ائتمه¬دی می؟ نیه اؤنو آولاماق ایستیرسن بویله؟ قوربانلیق قوزو حسابلیرسان اونی؟
» سلاحین وار؟« دییه سوروشدو آغانین اؤغلی.
» یوخ« دئدی.
»منده وار. دئدیم بیردن دردیمیزه دَیَر« دئدی آغانین اؤغلی» سینیرا آز قالدی« و سلاحی خورجوندان چیخاردی.
» کیم بیلیر نئچه ایلدن سؤنرا بورالاری ، سیزلری بیرده گؤره بیله¬جییمی« دئدی و گولومسه¬دی ماوی گؤزلی.
توفنگی نیشانه توتماغا باشلادی آغانین اؤغلی.
ماویم…ماویم دؤن بیر دالینا باخ. ووراجاق سنی آغانین اوغلی. هئچ اولماسا تورونا دوشدویون اووچونون گؤزلرینه باخ. سوتونو پایلاشدیغین کیشینی بیر اوتاندیر.
گؤزونه باخ سؤنرا تؤرپاغا دوش. باشینی آلیب گؤتوره¬جک سنین. قؤی ماشانی چکن بارماقلاری گؤزلریندن اوتانسین. قوجاغیما آلیب گؤتورنده آغانین اؤغلونی، سنیده ایسته¬دی آغا؛ ایکینیزیده ترَزی یه قؤیدولار. سندن قات قاتا چؤخ سوت چکمیشدی جانیمدان.
بیر نئچه چووال بوغدا یوللادی ائویمیزه. بوغدالاری گئری قایتاردیم آنالیغیما لکه دوشمسین دییه. منیم¬کی وجدان امری¬ایدی ماویجیم. بیرداها گؤندردی. بوغدالاری کندلیلره پایلادیم اونا نظر دَیمَسین نیّت¬ایله. شهرده نه گؤردون نه اؤیرندین بئله بلایه قاتدین باشینی اؤغلوم؟ یؤخسا کؤنول وئردین خالقینا وطنینه بو حاله سالیرلار سنی؟
دؤن ایگیدیم، آل الیندن توفنگی. وورما آما. قووالا چاپدیرا بیلر قدر آتینی. تؤپراقلاریمیزدان کناره قدر… ماشانی چکدی آغانین اؤغلی.
Arazazarbaijzn.anadilimiz@gmail.com

نوشته شده توسط admin در شنبه, ۲۳ تیر ۱۳۹۷ ساعت ۱۲:۲۰ ب.ظ

دیدگاه


8 × = هفتاد دو