بابالئیسان ایله ورقا

اوجا داغ باشیندا قوردوم دئیه‏نلر
مالین تعریف ائدیب بوردوم دئیه‏نلر
آسدیم، کسدیم، توتدوم، ووردوم دئیه‏نلر
کؤچدو، گئتدی اوندان قورو دام قالدی
دئمه‏یین فلانکس خاندی، پاشادی یانیندا قوللاری قوشا – قوشادی نوح ایدی مین دوققوز یوز ایل یاشادی ساناسان بیر سحر بیر آخشام قالدی مرندی آللاهی هئی نصیب ائیلر
شجرلر بوی چکر ائینی سیب ائیلر
اسکندر آتلاندی ای ناسی بگ‏لر نه جمشید اگلندی نه ده جم قالدی .
آشیق آللاهی سؤزون قورتاراندان سونرا گینه‏ده بابا لئیسانا چوخلو توهین‏لر ائله‏دی. آما بابا لئیسان دئدی: اوستاد، قوربانین کسیلیم. اگر ایندی عداوتی کنارا قویماساق گئدیب اوردا بیر ایش گؤره‏نمریک. بو ایدی کی باریشدیلار. سونرا هر ایکیسی، چکدیلر چاریقلارین دابانین کسدیلر یولون آمانین، دره‏لردن سئل‏کیمی تپه‏لردن یئل کیمی، آیاق اوزه‏نگیده، دیز قابیرقادا منزل به منزل یول گلیب. صحبتده منزل اولماز ایندی شیروان شهرینین دروازاسینا آز قالیرلار. بابا لئیسان آتین جیلووون چکیب دئدی: اوستاد بیر آز الی سویا یئتیره‏ک. آشیق آللاهی دایانمادی آتی سوردو دوز دروازادان ایچری. دئمه دروازانین اوستونده بؤیوک بیر تابلو یازیبلار کی شیروان شهرینه آشیق گلنمز هر آشیق گلسه گرک مریسا خاندان حؤکمو اولا.
ائله کی آشیق آللاهی ایچری گیردی دروازا مأمورلاری. قوروقچولار اونو توتوب سوروشدولار کی دده! حؤکمون وار؟ دئدی: یوخ. دئدیلر حقّین یوخدو شهره گیره‏سن. آشیق آللاهی بونلارا آغزیندان چیخانی دئدی بئله اولاندا مأمورلار هئچ خانا دئمه‏میش بونو توتوب سالدیلار زندانا. هئچ کیمین بو ایشدن خبری یوخ. اونون دالبادالی بابا لئیسان دروازایا چاتدی. بئله باخاندا تابلو گؤزونه توخوندو .
باخیب اوخویاندان سونرا مأمورلارا دئدی: آغالار! من مریسا خانی گؤره‏جگم. دئدیلر: آشیق ایچری گیرمگه حؤکمون وار یا یوخ؟ دئدی :آغالار! من اونون تانیشلاریندانام اؤزو ایلن ایشیم وار. مأمورلار بابا لئیسانا بیر نفر قوشدولار اونو آپاردی مریسا خانین یانینا. قاپینی چالدیلار آدام گلدی قاپیا. مأمور احوالاتی دئدی آشیغین دئدیک‏لرین مریساخانا یئتیردیلر. خاندان دستور اولدو: گیرین ایچری. بابا لئیسانا یول گؤستردیلر لئیسان دوز گلیب مریساخانین قاباغیندا دایاندی. احترام ائله‏دی. مریساخان بئله باخاندا گؤردو بیر جاوان‏دی حرکتیندن بللی‏دیر کی چوخ متین بیر آدام‏دیر. مریساخان دئدی: اوغلوم! نه‏یه گؤره گونده- گونده ایراندان بیر نفر دورور گلیر شیروانا؟ بیر بئله ناحاق قانا باعث اولور؟ بابا لئیسان احترام ائله‏ییب دئدی: خان ساغ اولسون منیم شاگردیم بورادا زنداندادیر، منه مکتوب گؤندریب من اونون دالینجا گلمیشم .
اوغلوم آدین نه‏دیر ؟
– آدیم لئیسان‏دیر .
لئیسانین آدی خانین قولاغینا دگن کیمی آیاغا قالخدی دئدی: گل ایچری. لئیسانی اؤز یانیندا اگلشدیردی. دئدی اوغلوم، سنین آدینی ائشیتمشیم آما دی‏ء گؤروم بیزی بو قیزین شرّیندن قورتاراجاق یوخسا سن ده آللاه ائله‏مه‏میش قیرخ آشیغین قانینا باعث اولاجاقسان ؟
بابا لئیسان دئدی :خان ساغ اولسون اگر سن اذن وئرسن اومود آللاها وار اونون جوابین وئره‏م و آشیقلاری قورتارام. بو کین – کدورت ده آرادان گؤتوروله. بو سؤزلر مریساخانین خوشونا گلیر آما اومودو یوخدو بابا لئیسان بو ایشی خوش عاقبت ایله باشا یئتیره. دئدی :اوغلوم، بیر دانیش گؤروم نه‏یین وار ؟
بابا لئیسان آلدی گؤره‏ک نه دئییر ؟
قالمیشام خاک زمینده قادر سبحانه باخ یوخ یئرلردن خلق اولوندو دریای عمّانه باخ چالدی مسلسل قلمین گیردی دوندان – دونا باخ صلّ علی آل عبا عالیمِ حیرانه باخ
سنگ رفدن بیر پر آتدی عالم اولدو لاله‏زار
یوز ییرمی دؤرد مین ارن‏لر خشم‏ایلن قیلدی نظر
یارادیبدی حیات اوسته سگگیز ال آب کوثر
یازیلیبدی اول دؤورونده گلمه بو رضوانه باخ عیسی کی گلدی جهانا نورو توتدو هر یانی مریم بیر پاک باجی‏ایدی اوجالتدی مسیحانی قیرخ گون پرهیز ائله‏مک‏له آرتیردی مسلمانی گؤیلره عروج ائله‏ین عیسایا عرفانی باخ یئددی یئردی یئددی گؤیدو یئددی‏دیر خاک زمین
جبراییل شاهپرین سالدی عرش علایه دوشدو، گون مشکل‏لری حلّ‏ائله‏دی بابای لئیسان ایچون آچ گؤزونو ده‏لی کؤنلوم حبیب رحمانه باخ .
سؤز باشا چاتدی. مریساخان گؤردو بو علم کی بو آشیقدا وار بیر مملکته جواب وئره بیلر.دستور وئردی بابا لئیسانا یئمک – ایچمک گتیردیلر. اونا احترام ائله‏دی،اؤز یانیندا اگلشدیردی .
بیر نفر ده گؤندردی پریزادین یانینا، کی منیم بیر آشیغیم وار حاضر اوْل اونلا باغلاشماغا .
هر یانا خبر وئردیلر، میدان سولانیب سوپورولوب او گئجه‏نی ده بابالئیسان مریساخانین ائوینده قالدی .آما هله آشیق آللاهی‏دان خبر یوخدو .مریساخان دستور وئریب تمام کاروانسرالاری، دوشرگه‏لری آختاریبلار آما هئچ بیر نشان تاپماییبلار. بابا لئیسان نگران‏دیر. هر حالدا او گئجه سحر اولدو. تمام شهرین آدامی بؤیوک، کیچیک میدانا گلیب میدان جمعیتدن قیمبیلداییر. دؤرد دؤوره اگلشیبلر هامی منتظردی گؤرسون ایشین آخیری نه اولاجاق؟ لحظه به لحظه جماعت چوخالیر. بیر طرفده پریزاد قیرخ کنیز دؤرد دایه باشیندا بیر طرفده مملکتین اعیانی اشرافی، وزیر- وزراسی ،نوکر – نایبی ،غلاملاری، بؤیوک باشلاری هر کس اؤز یئرینده بیر طرفده اوتوز دوققوز آشیق، بویونلاریندا زنجیر آیاقلاریندا کونده، اطرافلاریندا جلادلار، بو طرفده مریساخان ،باشیندا اللی نفر اؤز آداملاریندان ،بابالئیسان دا اونلارین یانیندا .خلاصه غریبه بیر صحنه‏دیر .
بابالئیسان گؤز دولاندیردی میدانین هر یانینا نظر سالدی نه ورقانی گؤردو نه آللاهی‏نی .احوالاتی مریساخانا دئدی. دئدی: خان ساغ اولسون نه منیم شاگردیم بورادادیر نه یولداشیم .بو سؤز پریزادین قولاغینا چاتدی .جواب گلدی بونلاردان سوای آشیغیمیز یوخدو. اوّلده عرض اولونوبدو کی گولستان ورقایا عاشق اولدوغونا گؤره ایسته‏میردی کی ورقا میدانا گله چون پریزاد ایله دیل بیر اولموشدولار کی آشیقلاری اؤلدورسه‏لر ده ورقانی اؤلدورمه‏یه‏لر. آما ورقا بابا لئیسانین شاگردی‏ایدی اونا گؤره‏ده گرک میدانا گله‏ایدی. دستور اولدو گئدیب ورقانی گتیردیلر. گولستان دا قیرخ کنیز دؤرد دایه باشیندا گلیب میدانین بیر طرفینده دایاندی. ایندی بو دفعه آشیق آللاهی یوخدو. دستور اولدو جار چکدیلر هر یاندا بئله بیر آدام وار گتیرین میدانا. آخر مأمورلاردان بیری گلیب دئییب کی خانیم! ایکی گون بوندان قاباق بیر نفر گلیب شهره مأمورلارا حمله ائله‏دی اونا گؤره توتوب سالدیلار زندانا. دستور اولدو گئدیب اونو گتیرسینلر. گئدیب آشیق آللاهی‏نی گتیردیلر. آللاهی میدانا چاتان کیمی دوز گئدیب میدانین اورتاسینا سازین چیخاردیب اذن‏سیز – اجازه‏سیز نه آغینا باخیب نه قاراسینا آلدی بو سؤزلری دئدی :
ای آغالار، مسلمانلار بیر قیز چیخیب دینه یاغی هر گلن‏لر منی دانلار یوخدو بو قیزین آنلاغی نه مدت‏دی من بو گونده باغریمین باشی دوگونده هانسی مذهب هانسی دینده قوناق اولار گؤز دوستاغی آللاهی‏یام یئتدیم جانا یاندی باغریم دؤندو قانا
یئتیشن یوخ حق دیوانا تمام سؤزلر قالیب باقی. دؤرد دؤوره باخیردیلار. ایندی بو دفعه پریزادین بیر آشیغی وار، آشیق سرگیز آدیندا. قیز دستور وئردی آشیق سرگیزه: قالخ بو آشیغین جوابین وئر. اونو باغلا قات اوتوز دوققوز آشیغین ایچینه. آشیق سرگیز سازین گؤتوروب گیریب میدانا آشیق آللاهی ایله اوز به اوز دایانیب بو سؤزلری دئدی :
ای ایراندان گلن آشیق سن بورا بیهوده گلدین رسمینی بیلمه‏ین آشیق سن بورا بیهوده گلدین آشیق آللاهی جواب وئریر :
سنه دئییم آشیق سرگیز من بوردا قالماغا گلدیم لاپ سؤزون آچیغین دئییم خانیمی آلماغا گلدیم آلدی آشیق سرگیز :
آشیق گلیب بوردا قالا شیروانا زلزله سالا قورخورام خانیمی آلا
سن بورا بیهوده گلدین