آنا اوره‌یی

آنا اوره‌یی

داود_پیرعلیلو (یورقون یکانی)
آنادیلیمیز: بؤیوک چیلله‌دن بئش- آلتی گون گئدیر. هاوا چوخ سویوق شاختادیر. داغ‌لارا باخاندا ائله بیل آغ یومورتادیرلار. هر یانی قار بورویوب، آغ- آپباق چادیرینی زیروه‌لرین باشینا اؤرتوب‌دور. ائله شاختادیر کی، توپورورسن گؤیده دونور. بیریان‌دان دا سازاق، هر نفس چکه‌نین جانینی آلیر. سکوت داغ‌لارا حاکیم‌دیر، امما هردن قوردلارین اولاماسی داغ‌لارین سس‌سیزلییینی سیندیریر، او داغ‌دان- بو داغا دوشوب، انیسانین جانینا زهم اوتوردور. بوتون حئیوان‌لار یئمک بابتیندن چوخ مضیقه‌ده‌یرلر. قارین چوخلوغو هر زادین اوستونو اؤرتوب‌دور، اونا گؤره بیر زاد تاپا بیلمیرلر یئسینلر. ایللاه قوردلار کنده هوجوم گئتیریب، کندده یاشایان‌لارین حئیوان‌لارینا و اوشاق‌لارینا حمله ائدیب، یارالاییر یا دا آپاریرلار.
بیر قادین، اوچ بالاجا اوشاق ایله کندین لاپ قورتاران باشیندا، بیر یاماجین اته‌یینده یاشاییر. اونون دار دونیادا اولدوغو بیر باش مال‌دیر کی، اونون سوتو ایله ائوده یاشایان‌لارین یاوانلیغی‌نی تامین ائدیر.
کندده های دوشوب، هئچ کیم گئجه لر ائشییه چیخماسین کی، قوردلارین سوروسونه راست گلمه‌سین. قوردلار آج قالیب، بیر زاد تاپا بیلمیرلر، هر نفس چکه‌نه هوجوم ائده‌رک اونو توتوب، آپاریب ییرتیب، یئییرلر.گئجه یاریسینا آز قالیب، او قادینین لاپ بالاجا اوشاغی یوخودان دوروب، آناسیندان سو ایسته‌ییر.آنا گئدیر کوزه‌نین باشینا سو گتیرمه‌یه،گؤرور کوزه‌ده دامجی دا سو قالماییب. ائولری پالچیق‌دان، قاپی- پنجره‌لری تاختادان‌دیر. قاپی- پنجره‌لری آچیب اؤرتَنده جیرهاجیر سسی هر یانی گؤتورور. آنا، ائوین قاپی‌سینی جیر ها جیر ایله آچیب، حیه‌ط‌ده تالارین آلتیندا کی سئینگ‌ین باشینا گئدیب، گؤرور اوندا دا سو قالماییب. هاوا بوران- شاختادیر، ائودن ائشییه چیخیب، قاییدانا قدر اینسانین الی- آیاغی دونوب، بوز باغلاییر. ائو قاپیسی‌نین دمیر دستگیره‌سینه ال آتاندا آدامین اَلی یاپیشجاق دونور قالیر اوندا.
قادین او حال ایله ائوه قاییدیب،گؤرور اوشاق سودان اؤتور یئنه ده آغلاییر. بیرآز دایانیر بلکه اوشاغی یوخو توتوب یاتا. آمما اوشاغین سسی گئت به گئت اوجالیر. آنا اوره‌یی‌دیر دا نه دئمک! او بیری اوشاق‌لاری یوخودان اویالدیر، تصمیم توتور بولاغا گئدیب، کوزه‌نی سو ایله دولدوروب، گتیرسین. باش- گؤزونو برکیدیر، ائوین قاپی‌سینی دالدان یئزه‌له‌ییر. اوشاغی آغلایا- آغلایا قویوب، ائوی بولاغا ساری ترک ائدیر.
ائو ایله بولاغین آلتی- یئددی یوز مئتیر آراسی واردیر. هر یئر شوشه بوز باغلاییب، آیاق قویورسان زویور. قادین آددیم‌لارینی یاواش- یاواش گؤتوره- گؤتوره، هردن ده بوزون اوستونده زویوب ییخیلا- ییخیلا بولاغا ساری گئدیر.گؤی‌ده ده آی‌دان خبر یوخ‌دور، هر یئر زیل قارانلیق‌دیر. قوردلارین اولاماق سسی داغ‌لاردان باج آلیر، هر بیر نفس چکه‌نین باغرینی چاتلادیر .آمما آنا، آددیم‌لارینی یاواش- یاواش گؤتوره‌رک گئتمک‌ده‌دیر.اولدوزلار هرگئجه‌دن برک پارلاییر. او شاختانین، بورانین، سازاغین ایچینده گؤی ائله گؤزل‌دیر کی، هر باخانی اؤزونه غرق ائدیر. قادین آددیم‌لارین گؤتوردوکجه “بسم الله” دئییب، گئدیر. بولاغا بیر آز قالان بولاغین شیریلتی‌سی قاریشیر قوردلارین سسینه. قادین اولدوزلو بولاغا یئتیشیب، کوزه‌سینی سو ایله دولدورور.
بیر نئچه لحظه ال‌لرینی هوولاییب، قولتوق‌لاریندا قیزدیریر. سونرا کوزه‌نی گؤتوروب، ائوه ساری یوللانیر. بیر آز گئدندن سونرا آیاغی زویور، بوزون اوستونده ییخیلیر، آمما کوزه‌نی الیندن اؤتورمور. آیاغی برک اینجیسه ده، یئنه کوزه‌نی گؤتوروب، او هاوادا ائوه ساری گئدیر. بیردن کندین ایت‌لری ده‌ییر بیر- بیرینه؛ قوردلار کنده گیریرلر.
قورخو، اوشومه‌یی قادین‌ین یادیندان چیخاردیر. داها سویوغو بیلمیر. ائوه بیرآز قالاندا، بیردن قوردلارین سوروسو قادین‌ین قاباغینی کسیر. ایستیرلر قادینی توتالار. قوردلارین خورولتوسو هر نفس چکه‌نین جانینا ترپَم سالیب، تیتره‌دیر. آمما او حالدا دا آنانین یئنه فیکری اوشاغی‌نین یانیندا‌دیر.قادین کوزه‌نی یئره قویوب، بیردن چیغیریر.
“آی… هاوار!… گلین، قوردلار ایستیرلر منی یئسینلر، یاردیما گلین! آی… هاوار!…” کیم‌دیر اونون سسینی ائشیدن؟! قوردلار یاواش- یاواش قادینا یاخین‌لاشیر، یاخین‌لارشیر…لاپ توتان لحظه‌ده، بیردن بیر یئکه قوردون گؤزلری پاریلدایارکن، کئچیر قوردلارین قاباغینا، قویمور قوردلار قادینا دیش باتیرسینلار. قادین دئییر بس قوردلارین قاباغینی کسن، کندین ایت‌لریندن‌دیر. قارانلیق‌دا کوزه‌نی گؤتورنده قوردلار یومولوب، قاباق‌لارینی کسن قوردو ائله ییرتیشیب حیوانی لاپ یارالاییب جاندان سالانا قدر قادین اؤزونو ائوین قاپی‌سینا یئتیریر. قاپینی آچاندا، ائوده یانار فانارین ایشیغی دوشوب، قوردلاری بیر آز قورخودور، قوردلاری دالی‌یا قایتاریر. قادین تئز اؤزونو ائوه یئتیریب، قاپی‌نین دالیسینی برکیدیر. ال‌لری تیتره‌یه- تیتره‌یه اوشاق‌لارا دئییر:– نه دیر گول بالا لاریم؟! نیه چیغیریرسیز؟! آناز بودو گلدی، قورخمایین!آنا بو سؤزلری دئیه- دئیه اوشاق‌لارا اورک وئریب، اونلاری اُووداندان سونرا، بیر ساخسی سئیین گؤتوروب، سو ایله دولدورور.
سونرا اوشاغین بویونو اوخشایا- اوخشایا اونا سو ایچیردیر. ساناسان هئچ بیر زاد اولماییب، اوشاغین سویونو وئریب، لایلا چالیب، اونو یاتیردیر. او بیری اوشاق‌لار دا آنالاری‌نین لایلا سسی ایله یوخولاری توتور، یاتیرلار. آمما قوردلار هله ده ال چکیب گئتمه‌ییبلر. او یارالی قورد دا، یارالی- یارالی اونلارین قاباغیندا دوروب.اوشاق‌لار یاتاندان سونرا دا، هله قادین‌ین ال‌لری‌نین تیترتمه‌سی آرادان گئتمه‌یب. ال‌لری تیتره‌یه- تیتره‌یه قاپی‌نین چاتیندان قوردلارا باخیر. گؤرور قوردلارین قاباغینی کسه‌ن، بیر آنا قورددرو،کندین ایت‌لریندن دییل.
قادین لاپ باخا قالیب حئیران بو سورونا کی، او قورد نه دن قوردلارین قاباغینا چیخیب، قادینی اؤلوم‌دن قورتاردی. او حالدا، قورد قولاق چالاندا قادین گؤردو قوردون ساق قولاغی‌نین بیر طرفی کسیلیب. بیردن یادینا دوشدو نئچه ایل اوندان قاباق، او قوردو ایکی بالاسی یانیندا ایکن کندین ایت‌لری بوغوردو. او بوغوشمادا اونون قولاغی قوپوموشدو، اؤزو ده برک یارالانمیشدی. قادین او قوردو ایت‌لرین الیندن قورتاریب، نئچه گون بیر طؤوله‌ده او قوردو ساخلاییب، یئمک وئریب، درمان ائله‌میشدی. سونرا اونو آزاد ائله‌میشدی. بو همن توختادیب،آزاد ائله‌دییی آنا قورددور. .او قوردون نئچه سوت امه‌ر بالاسی وار ایدی. اونلارین یوواسی، قادینین ائویندن بیر آز او یانلیق، یاماجین اته‌یینده، دره‌ده ایدی. قادین، اونلارا دا جماعت‌دن گیزلی یئمک آپاریب آتاردی کی، آجلاریندان اؤلمه‌سینلر.
قادینین بیر اَل آغاجی وار ایدی. ال آغاجینی همیشه قاپی‌نین دالیسینا قویاردی. ال آتیب تئز اونو گؤتورور، باشینا بیر آز کؤهنه پارچادان زاددان باغلاییب، اونا اود وورور. ال آغاجی یانا- یانا قوردلارا ساری گئدیر.
قوردلار اودو گؤروب، اوردان اوزاق‌لاشیب گئدیرلر. او یارالی قورد دا دوروب او قادینین اوزونه باخاندان سونرا ایسته‌ییر اوردان اوزاقلاشسین، قادین ائوه قاییدیب، بیرآز چؤرک گؤتوروب قاییدا کی، او قوردا آتا یئسین. گؤرور قورد یئره دوشوب اوزاندی.قورد، قادین یاخین‌لاشانا جان وئریب اؤلدو. قادینین بیر اَلی اولور بیر باشی. دونیا دولانیر باشینا کی، نیئه او قورد اؤلدو.
قادین ناراحات ائوه قاییدیر، سحره تک یاتا بیلمیر. سحر گون چیخاندان سونرا او قوردو آدام کیمی دفن ائله‌ییب، اونون اؤلوسونه بیله احترام‌لا یاناشیر. او گوندن تندیره کوت سالیب پیشیریر، گئجه‌لر ائولری‌نین چئوره‌سینه قویور کی، آج حئیوان‌لار تاپیب، یئسینلر .
او حیوان یئرتیجی اولا- اولا بونو دوشونور کی، قادین اونا یاخشی‌لیق ائدیب، جانینی، بالالارینی قورتارمیشدی. قورد، یاخشی‌لیغین قاباغیندا جانیندان کئچیب، بونو ثابت ائدیر کی، یاخشی‌لیق ایتمز، یاخشی‌لیغین قاباغی یاخشی‌لیق‌دیر.تاسف‌له بیر تعداد آدام‌لار اؤزلرینی اشرف مخلوقات بیلیب، او ییرتیجی حئیوانجا یوخدورلار. یاخشی‌لیغا یامانلیق ائدیرلر. بئله اینسان‌لار محبت گؤزه‌سیندن سو ایچمه‌ییب‌لر بلکه ده…

نوشته شده توسط admin در دوشنبه, ۱۰ آذر ۱۳۹۹ ساعت ۱۰:۵۷ ق.ظ

دیدگاه


5 − = هیچ